හොඳ කුක් කෙනෙක් වෙන්න ඕන නම්....

https://all-free-download.com/free-vector/cartoon-chef.html

මං ඉස්සෙල්ලම උයන්න ගන්නකොට කරපු ගිනි විජ්ජුම්බර බලන් ඉන්නම බැරි තැන, කොළයක් අරගෙන ලියා ගන්න කියලා අපේ අම්මා මට මෙන්න මේ උපදෙස් ටික දුන්නා. ඒ ටික මට හෙන ප්‍රයෝජනවත් උනා එක, එක අවස්ථා වලදි. ළඟදි ඒක අහම්බෙන් මගේ අතට පත්වුනු නිසා, මට හිතුනා කවදා හරි, කාට හරි ප්‍රයෝජනයක් වෙන්නත් එක්ක, ඔන්න ඔහේ ලියලා දානවා කියලා. තමුන්ට දැන් අවශ්‍ය නැතත් මට වගේ දරුවෙකුට හරි කියලා දෙන්න පුළුවන්නෙ…

1. තමුන් මොන තරම් හොඳට උයන්න දැනගත්තත් වැඩක් නෑ, අදාල කෑම දීසිය හදන්න ගන්න අමුද්‍රව්‍ය හොඳ තත්වයේ නැත්නම්, ඒක හංගන්න බෑ. රසයෙන් හරි, පෙනුමෙන් හරි දැනෙනවා. ඒ නිසා හැකි සෑම වෙලාවකම හොඳ තත්වයේ අමුද්‍රව්‍ය පාවිච්චි කරන්න.
2. කෑම වර්ග ගැන ඕනෑවට වඩා බරපතල විදියට හිතන්න යන්න එපා. එහෙම හිතන්න ගියොත් ඒක එපා වෙනවා. කෑම හදනකොට ඒකෙන් සතුටක් විඳින්න පුරුදු වෙන්න. ඒක එහෙම උනත් බරපතල විදියට හිතන්න ඕන දේ තමයි, තමුන් පාවිච්චි කරන අමුද්‍රව්‍ය ආවෙ කොහෙන්ද කියන එක. දැන් කාලෙ අපි කන හැම දෙයක්ම වගේ රසායන ද්‍රව්‍ය වලින් නාවලා, පොඟවලා තියෙන නිසා, එහෙම නැති එළවලුවක්, විශේෂයෙන්ම පළා කොළ වර්ගයක් වගේ දෙයක් ටිකක් මහන්සි උනොත් ගෙදරම වවා ගන්න පුළුවන්. එහෙම උනාම තමුන් ළඟ තියෙන දෙයක්, තවත් එහෙම ගෙවතු වගාවක් තියෙන කෙනෙකුත් එක්ක හුවමාරු කරගන්න පුළුවන්. (මට මතකයි අපි පුංචි කාලෙ අපේ වත්තෙ හැම තැනම තිබුනු පැෂන් දීලා වෙන ගෙදරකින් ඇඹරැල්ලා ඉල්ලා ගත්තු හැටි. නිකම් අත් දෙක වන වනා ගිහින් ඉල්ලනවට වැඩිය, එයාලත් කැමතියි ඒකට. හැබැයි ඉතින් අපි එයාලට අච්චරක් දුන්නට, අපට දුන්නෙ මෙච්චරයි කියන්න නම් බලන් ඉන්න එපා.) 
3. බොහොමයක් වෙලාවට සරල, සිම්පල් කෑම තමයි වඩා හොඳ. තමුන්ට ඒ උයන්න යන කෑමක් ගැන මොනවා හරි සැකයක් තියෙනවා නම්, අයින් කරන්න. ඒක උයන්න යන්න එපා.
4. පිරිසිදුව වැඩ කරන්න ඉගෙන ගන්න. එක වැඩක් කළාම ඒකට ගන්න භාජන, ඉතුරු බිතුරු ඒ වෙලාවෙම අයින් කරලා සෝදලා දාන්න ඕන. නැත්නම් අන්තිමේදි උයලා ඉවර වෙනකොට මහ කන්දක් ඉතුරු වෙනවා සෝදන්න, සුද්ද කරන්න. ඒකෙන්ම ඉවිල්ල එපා වෙනවා. කුක්කා පිරිසිදු නම් එයාගෙ කෑමත් පිරිසිදුයි.
5. උයන්න කරන්න නවීන පන්නයේ ගැජට් සීයක් විතර ඕන වෙන්නෙ නෑ. මොකක් හරි දෙයක් කරන්න, මේ ලෝකෙ එකම එක විදියක් තියෙන්නෙ බොහොම කලාතුරකින්. ඒ නිසා අළුත් ක්‍රම ඉගෙන ගන්න නිතරම සූදානම් වෙලා ඉන්න ඕන. එක විදියකට බැරි නම් තව විදියකට. තමුන්ටම තමුන්ගෙ අළුත් විදියක් සොයාගන්නත් පුළුවන්. එහෙම තමයි අළුත් රෙසිපි බිහි වෙන්නෙ.
6. ඉස්සෙල්ලම සොයා ගන්න තමුන් කන්න කැමති මොන වගේ කෑම වර්ගද කියලා. ඒවා උයන්න. එතකොට ඒකට ආසාවක් ඇති වෙනවා.
7. අන්තිමටම කියන්න තියෙන්නෙ, උයන්න ඕන වෙන මූලික ක්‍රම ගැන හොඳට ඉගෙන ගන්න. හොඳටම. මං කියන්නෙ 'අතැඹුලක් සේ'. ඒවා හොඳට දැන ගත්තම අළුත් ආකාරයේ කෑම තමුන්ටම නිර්මාණය කරගන්න පුළුවන් බොහොම ලේසියෙන්.

ගෙදර උත්සව අවස්ථාවකට කෑම පිළියෙල කිරීම

1. තමුන්ට ලේසියෙන්ම හදාගන්න පුළුවන් සරල කෑම වේලක් සූදානම් කරන එක තමයි හැම වෙලාවෙම හොඳම දේ වෙන්නෙ. නැත්නම් සංකීර්ණ, ලේසියෙන් උයලා ඉවර කරගන්න බැරි කෑම හදන්න ගිහින් කුස්සිය දෙවනත් කර කර, ගෙදර ඉන්න අනිත් අයටත් බැන බැන, අත් දෙක ඔළුවෙ ගහගෙන එහාට මෙහාට දුවලා වැඩේ අනාගෙන තමයි නවතින්න වෙන්නෙ. එතකොට ගෙදර කෑම දෙන එක එපා වෙනවා.
2. සමහර කෑම ජාති තියෙනවා කලින් මැරිනේඩ් වෙන්න දාන්න පුළුවන් ඒවා. ඒ වගේ ජාති කලින් දවසෙ පිළියෙල කරලා ශීතකරණයට දාන්න පුළුවන්. විශේෂයෙන්ම මස් වර්ග. එතකොට රසය වැඩියි. එහෙම උනාම පස්සෙන්දට ඒ වැඩේ අඩු වෙනවා. ඒ වගේම අතුරුපසත් පුළුවන් කලින් දවසෙ රෑ හදලා ශීතකරණයට දාන්න. එහෙම උනාම උයන වෙලාවට වැඩ අඩුයි.
3. මේ වගේ ගෙදර සංග්‍රහයකට මෙනු එකක් පිළියෙල කරන්න කලින්, ආරාධනා කරලා තියෙන ඇත්තන්ගෙන් එයාලා කන්නෙ නැති ජාති, ඇලර්ජි කෑම ජාති, වෙජිටේරියන්ද කියලා එහෙම අහලා දැන ගත්තම කන්න ගියාම වෙන ප්‍රශ්ණ අඩුයි. නැත්නම් අන්තිම මොහොතෙ අච්චර මහන්සිවෙලා උයලා තියෙද්දි අර නොකන අයට කන ජාති ආයෙම හදන්න වෙනවා. ඒකට අවශ්‍ය දේවලුත් තියෙන්න එපායැ. එහෙම උනාම ඒක මහ ජංජාලයක්.

බඩු ගේන්න කඩේ ගියාම…

1. නිතරම ඕන දේවල් ලිස්ට් එකක් හදාගෙන යන්න. නැත්නම් සමහර වෙලාවට කඩේ යන්නෙම එකක් ගේන්න, අන්තිමට ගෙදර එන්නෙ ඒ ජාතියම නැතුව. ඒක නැතුව උයන්න යන දේ උයන්නත් බෑ. 
2. බඩු කිහිපයක් විතරක් ගන්න කඩේ ගියා නම් නිතරම බාස්කට් එකකට බඩු ගන්න. බැරි වෙලාවත් ට්‍රොලියක් ගත්තොත් තමුන්ට නොදැනීම ඒක පිරෙනවා පැය බාගයක් යන්නත් කලින්. ඕන ඒවායි, එපා ඒවායි ඔක්කොම.

https://firstrategifts.com/products/kitchen-conversion-chart-bbq-meat-temperature-guide-magnets

මේක මේ උත්සව කාලෙ, ඉස්කෝලෙ නිවාඩු කාලෙ මගේ දෝනිලා වගේ කාට හරි ප්‍රයෝජනවත් වේවි කියලයි දැම්මෙ….