මිස්ගෙ බෑග් එක....



මං අර කලින් කියපු "යාළුද බලපු හැටි" කතාවෙ කිව්වනෙ පොඩි කාලෙ ඉගෙන ගත්තු කණිෂ්ඨ විද්‍යාලෙ ගැනත් ඒකෙ උගන්වපු ගුරුවරු වැඩි දෙනෙක් අපේ අසල්වැසියො බවත්....  ඔන්න හතරෙ පන්තියෙදි පළමු වතාවට මං වැටුන අසල්වැසියෙකු නොවුනු මිස් කෙනෙකුගෙ පන්තියට.... ඒ උනාට මිස්ගෙ අයියා අපේ අසල්වැසියො... එයා නිතර අයියලගෙ ගෙදර යන එන නිසා අපිව හොඳට දන්නව.... ඒ කාලෙ අළුත් පන්තියක් පටන් ගන්නකොට පන්තියේ ළමයි පොඩි සම්මාදමක් හෙම දාල පන්තියට ඕන කරන ඉදල්, කොසු, ගුරු මේසෙට ඉටි රෙද්දක්, මල් වාස් එකක්, නාම ලේඛනයට කවරයක් දාන්න බ්‍රවුන් පේපර් කොළයක් නොවැරදීම ගන්නව.... එහෙම ගත්තම පන්තියේ නම ඒ හැම එකකම හණ ගහන එක නම් නොවැරදීම කරනව... නැත්නම් මදි පාඩු වෙනකොට අනිත් පන්තිවල එවුන් ඕක උස්සනව.... ඒත් සමහර වෙලාවට හණ ගහලවත් බේරගන්න බැරිවෙන වෙලාවලුත් තිබුණ.... උස්සපු එවුන් කරන්නෙ ගහල තිබුණු හණ සූරල මකල දාල ඊට උඩින් උන්දලගෙ පන්තියෙ නම ගහගන්න එක... ඒ උනාට ඉතින් තමුන්ගෙ පන්තියෙ භාණ්ඩෙ අඳුනගන්න පුළුවන්නෙ.... ඉතින් දෙගොල්ලො මරාගන්නව... කෙල්ලො ටික ගිහින් කොල්ලොන්ට පණිවුඩේ දීපු ගමන් උන් තමයි වලියට යන්නෙ....


 

එක සැරයක් මට මතකයි අපේ පන්තියෙ කොස්ස අල්ලපු පන්තියෙ උන් හොරකම් කරල.... මං දැක්ක උන් අපේ පන්තියෙ නම බ්ලේඩ් තලයක් අරගෙන සූරනව... ඒ දවස්වල පැන්සල් උල් කළේ වැඩිහරියක් බ්ලේඩ් වලින්... කටර් පාවිච්චි කළේ කලාතුරකින් කෙනෙක්.... ඒ නිසා බ්ලේඩ් එකක් හොයාගන්න එක එච්චර අමාරුවක් උනේ නැහැ.... ඒ වෙනකොට අපේ පන්තියෙ කොස්ස සොයල සොයල හොයාගන්න බැරුවයි හිටියෙ...  ඒ වැඩේ කරපු උන් මං හොඳට දන්න කෙල්ලො දෙන්නෙක්... යාළුවො... ඉතින් මේක දැක්ක ගමන් මං ගියා එතැනට...
'දෙනව ළමයො අපේ කොස්ස... මේ ළමයි ඒක හොරකං කරල...'
'ආ... මේක අපේ ... මේ පේන්නැද්ද නම...'
'අ...බොරු කියන්නෙපා.... මං දැක්ක දැන් ඔය ළමයි අපේ පන්තියෙ නම හූරනව... හිටුකො කියන්න අපේ මිස්ට...'
ඔන්න ඔහොම වලිය පටන් ගන්නකොට කොල්ලො සෙට් උනා ඉතුරු ටිකට... අන්තිමට පන්ති දෙකේ උන් කොස්සෙ දෙකොනින් අල්ලගෙන දෙපැත්තට ඇදලා අපේ පන්තියෙ එවුන් අතට කොහු මිටිය ගැලවිලා ආව... හොරු ටික අතේ මිට... අන්තිමට මිස් පන්තියට එනකොට දෙගොල්ලො කෑලි දෙක තියාගෙන ඉන්නව... එක පන්තියක්වත් පිහිදල නෑ... ඉතින් උදේ පාන්දර ඉගැන්නිල්ල පැත්තක තියල රණ්ඩු බේරල, කොස්ස ආයෙ ඇණ ටිකක් ගහල හදාගෙන, පන්ති දෙකම සහයෝගෙන් පිහිදවල තමයි මිස්ලට වැඩ පටන් ගන්න උනේ....

අපි කෙල්ලො ටික ඔය කාලෙ කරපු තව වැඩක් තිබුණ... මිස් එන වෙලාව අල්ලලා පාර බලන් ඉන්න එක.... අපේ මිස් එන්නෙ ඉස්කෝලෙ පටන් ගන්න බෙල් එක ගහන්න ඔන්න මෙන්න කියල දුවගෙන දුවගෙන.... අපිත් ඉතින් ඊට හයියෙන් පෙරමගට දුවගෙන ගිහිල්ල මිස්ගෙන් බෑග් එක ඉල්ලගන්නව පන්තියෙන් ගෙනිහින් තියන්න... ඔය වෙලාවට මිස් පෑන විතරක් අතට අරගෙන අතේ තියෙන අනිත් ලට්ට ලොට්ට ඔක්කොම අපිට දෙනව ගිහින් තියන්න... තව ටික කාලයක් යනකොට මිස් එනකම් ඉවසගෙන ඉන්නෙ නැතුව ඉස්කෝලෙ ළඟ තිබ්බ මිස්ගෙ ගෙදරටම යන්න පටන් ගත්ත.... අපි ඔහොම යනකොට සමහරදාට මිස් නයිටිය පිටින් එහෙ මෙහෙ දුවනව ගෙදර වැඩ කර කර... තව සමහරදාට ළිඳ ළඟ රෙදි හෝදනව.... අපිත් අරින්නෑ, යනව ළිඳ ළඟටත්.... ගිහින් අහනව බෑග් එක ගෙනියන්නද කියල.... මිස්ටත් හිනා ඔය වැඩේට.... ඒ උනාට මිස් එන්න එපා කිව්වෙත් නෑ... බෑග් එක නොදී හිටියෙත් නෑ... ගෙදර හිටියොත් මිස්ම එයාගෙ බෑග් එක ගෙනැත් දෙනව.... ළිඳ ළඟ හිටියොත් එයාගෙ මහත්තයට හරි දරුවෙකුට හරි කෑගහල කියනව අපට බෑග් එක දෙන්න කියල.... ඔය විදියට මිස් ඉස්කෝලෙ එන්න පැය බාගෙකට විතර කලින් එයාගෙ බෑග් එක අරන් ඇවිත් ගුරු මේසෙ උඩ තියල තියනව.... දැන් මිස් ගෙදර උනාට බෑග් එක ඉස්කෝලෙ....

ඔන්න දවසක් ඔය විදියට අපි ගියා මිස්ලගෙ ගෙදර බෑග් එක ගේන්න.... අපි යනකොට ගෙදර දොරකඩ ඉස්කෝලෙ යන්න ලැහැස්තිවෙලා හිටිය පුතා (එයා ගියේ ලොකු ඉස්කෝලෙට )අපිව දැක්ක ගමන් 'ආ...' කියල ගෙට ගිහින් මිස්ගෙ බෑග් එක අපිට ගෙනත් දුන්න.... අපිත් අරන් ආව.... දැන් පන්තිය පටන් ගන්න බෙල් එකත් ගැහුව, මිස් නෑ.... ගාථා කියල එහෙම ටික වෙලාවක් යනකොට අපේ පන්තියෙ ළමයි කෑගහන නිසා අල්ලපු පන්තියෙ මිස් ආව මොකද කියල බලන්න.... අපේ මිස්ගෙ බෑග් එක මේසෙ උඩ තියෙනව දැකල ඒ මිස් ළමයින්ගෙන් ඇහුව,
'මිස් කොහාටද ගියේ....?' කියල...
'අපේ මිස් තවම පන්තියට ආවෙ නෑ මිස්...' ඉස්සරහ පේළියේ හිටිය ළමයෙක් කිව්ව...'එහෙනම් මේ බෑග් එක තියෙන්නෙ...'
අපි සද්ද නැතුව හිටිය වැරැද්දක්වත් කළාද කියල ෂුවර් එකක් නැති නිසා... පන්තියෙ එවුන් මූණෙන් මූණ බල බල හිටිය මිසක් මොකුත් කියන්න ගියේ නෑ... අර මිසුත් මේ මොන විලම්බීතයක් කියනවද කියන්නැහේ ටික වෙලාවක් ළමයි දිහා බලන් ඉඳල අපිට කිව්ව,
'මිස් ඔෆිස් එකේ වෙන්නැති... ඒ එනකම් නිශ්ශබ්ද වෙලා ඉන්න...' කියල..ඒ කියල එයා ගියා එයාගෙ පන්තියට...

දැන් ඔහොම ටික වෙලාවක් ගියා... ඔන්න අපට ඇහුන මෝටර් සයිකලයක් පන්තිය කිට්ටුවට ඇවිත් නවත්තනව... පන්තියෙ ළමයි ඔක්කොම වගේ නැගිටල බෙලි දික්කරල බැලුව කවුද ඇවිත් තියෙන්නෙ කියල.... කවදාවත් නැතුව අපේ මිස් මහත්තයත් එක්ක මෝටර් සයිකලේ ඇවිත්.... මිස්ව පන්තිය ළඟින් බස්සවල මහත්තය ගියා... මිස් දුවගෙන දුවගෙන ආව පන්තියට.... අල්ලපු පන්තියේ මිසුත් සද්දෙට එළියට ඇවිත් බැලුව....'මොකෝ උනේ...?' ඒ මිස් අපේ මිස්ගෙන් ඇහුව...
ඒ වෙනකොට පන්තිය ඇතුලට පය ගහල හිටපු අපේ මිස්,
'හයියෝ...... මේ තියෙන්නෙ...' කියල හයියෙන් හිනා වුණා....
'ඇයි මොකෝ....?'
'අනේ බලන්න... මං ඉස්කෝලෙ එන්න ලැහැස්තිවෙලා මගේ හෑන්ඩ් බෑග් එක හෙව්ව හෙව්ව පණ දාගෙන.... දන්නෙම නෑ පරක්කු වෙනකම්.... හොඳවෙලාවට මහත්තය ගෙදර හිටිය නිසා ගෙනත් දැම්ම... මේ තියෙන්නෙ මටත් ඉස්සෙල්ල බෑග් එක ඉස්කෝලෙ ඇවිල්ල...'
ඒක අහල අර මිස්ටත් හිනා...
'කවුද පුතේ අද අපේ ගෙදර ගියේ...?' මිස් පන්තියෙ කෙල්ලො දිහා බලල ඇහුව....
'අපි මිස්...' මමයි මගේ යාළුවයි අත ඉස්සුව....
'කවුද අද ඔයාලට බෑග් එක දුන්නෙ...?'
'මිස්ගෙ පුතා මිස්...'
'එහෙනං ඒක තමයි මේ... මිනිහ ඉස්කෝලෙ ගියා මේ ළමයින්ට බෑග් එක දීල නිකමටත් මට කියන්නෙ නැතුව.... මං අරෙහෙ පණ යනකම් බෑග් එක හොයනව....'